ව
පුත්තලමේ අරුවක්කාලු කසල ගැටලුව යටපත්කරමින් විල්පත්තුව පිළිබඳව සමාජ කතිකාවතක් නිර්මාණය කර ඒ තුළින් ජාතිවාදය ඇතිකිරීමේ කුමන්ත්‍රණයක් ක්‍රියාත්මක වෙමින් ඇතැයි කර්මාන්ත හා වාණිජ කටයුතු,දිගුකාලීනව අවතැන්වූ පුද්ගලයින් නැවත පදිංචිකිරීම,සමූපකාර සංවර්ධන සහ වෘත්තීය පුහුණු හා නිපුණතා සංවර්ධන අමාත්‍ය රිෂාඩ් බදියුදීන් මහතා පවසයි.
කොළඹ අල් හික්මා විද්‍යාලයේ 20 දා පැවැති උත්සවයකදී අමාත්‍යවරයා එසේ පැවසීය.
අමාත්‍යවරයා මෙසේ ද කීවේය. පුත්තලමට කොළඹ කුණු ගෙන එන එකට පුත්තලමේ මිනිස්සු විරුද්ධ වෙන එක සාධාරණයි. අපි කවුරුවත් කැමති නැහැ වෙන කාගෙවත් කුණු ගන්න.මේ කසල ගැටලුව ගැන පුත්තලමේ ජනතාව කියන්න පුලුවන් හැමෝටම කිවුවා.උත්තරයක් නැතිම තැන තමයි ඔවුන් කොළඹට ඇවිත් උද්ඝෝෂණයක් කලේ.
පසුගිය වසරේ (2018) අවසාන මාස කිහිපයේ රටතුළ පැවැති ප්‍රජාතන්ත්‍ර විරෝධී ක්‍රියාවලියේදී අපි ගත්තෙ හරි පැත්ත.ඒක තමයි නියම ප්‍රජාතන්ත්‍රවාදය.එදා ඒ සත්‍ය වෙනුවෙන් පෙනී සිටි අප අද පුත්තලමේ අරුවක්කාලු කසල ගැටලුව වෙලාවෙදිත් පුත්තලමේ අහිංසක ජනතාවගේ පැත්ත ගන්නවා.
පුත්තලමේ ජනතාවගේ කසල ගැටලුව ගැන පෙනී ඉන්න නිසා මට විල්පත්තුව කපනවා කියල චෝදනා කරමින් මේ දිනවල සමාජ මාධ්‍ය රැල්ලක් ක්‍රියාත්මක වෙනවා.මේවා හසුරවන යම් යම් අදිසි හස්ත ක්‍රියාත්මක වන බව අපට පේනවා.රජය ඇතුලෙ අමාත්‍යවරයකු ලෙස සිටියත් ජනතාවට අසාධාරණයක් වෙනවානම් අපි එයට දැඩි ලෙස විරුද්ධ වෙනවා.
මේ විදියට සමාජ මාධ්‍ය හරහා වැරදි පූර්වාදර්ශ සපයපු නිසා තමයි පසුගිය කාලයේ නුවර තෙල්දෙනිය , ගිංතොට වගේ ප්‍රදේශවල ගැටුම් ඇතිවුනේ.මේ විදියට විල්පත්තුව ප්‍රශ්නයක් කරලියට ගෙනවිත් මුස්ලිම් ජනතාව හා සිංහල ජනතාව බේදයක් ඇති කිරීමේ කුමන්ත්‍රණයක් ක්‍රියාත්මක වෙනවා කියලයි අපිට දැනෙන්නේ.මම ඉතා ඕනෑකමින් මේ ජාතිවාදය අවුලවන්න හදන පිරිසගෙන් ඉල්ලන්නේ දේශපාලනික වශයෙන් තරහක් තියෙනවානම් මගෙන් පලිගන්න,මේ රටේ අතීතයේ ඉදලා සහජීවනයෙන් කටයුතු කරපු සිංහල මුස්ලිම් ජනයාට නිදහසේ ඉන්න ඉඩදෙන්න.